Жанашырлыққа зәру емес…

Ерлан БАҚТЫБАЕВ, Алматы облыстық мүмкіндігі шектеулі жандарға арналған спорт клубының директоры.

Ерлан БАҚТЫБАЕВ, Алматы облыстық мүмкіндігі шектеулі жандарға арналған спорт клубының директоры.

Адам баласы дүние есігін ашқасын, қоғамның толыққанды мүшесі болады. Он екі мүшесі сау адамзат, айнала ортаға пайдасын тигізіп, мемлекеттің өрекендеуіне өз үлесін қосады. Ал, бүгінгі біз сөз еткелі отырған жандар ше? Мүмкіндігі шектеулі жандардың қоғамдағы ролі қандай? Мүгедек адамды көрген кезде іштей жанашырлық танытып қана қоятынымыз бар. Олардың қоғамның толыққанды мүшесі ретінде көптеген игілікті іс атқарып жатқанын біле бермейміз. Әсіресе, мүмкіндігі шектеулі спортшылардың еңбегі ерен. Бүгінде мемлекетіміздегі мүгедек жандарға үлкен қолдау көрсетілуде. Бұл спортшылар жанашырлыққа зәру емес, керісінші ел намысын қорғап жүрген жігерлі жандар.

Елбасымыз Нұрсұлтан Әбішұлы Назарбаев өзінің «Бір мақсат, бір мүдде, бір болашақ» атты Жолдауында: «Мүмкіндігі шектеулі азаматтарымызға көбірек көңіл бөлу керек. Олар үшін Қазақстан кедергісіз аймаққа айналуға тиіс. Бізде ондай адамдарға қамқорлық көрсетілуге тиіс – бұл өзіміздің және қоғам алдындағы біздің парызымыз. Бүкіл әлем осымен айналысады. Біз оларды белсенді өмірге тартамыз, олар тек жәрдемақы алып қана қоймайды, сонымен бірге, өздерін қоғамның мүшесі, пайдалы еңбеккер ретінде сезінетін болады. Біздің барлық әлеуметтік институттар, үкіметтік емес ұйымдар, «Нұр Отан» партиясы осы жұмысты қолға алғандары жөн. Егер қажет болған жағдайда Үкімет бұл мәселені барлық компаниялармен бірлесе пысықтап, тиісті шешім қабылдауы керек», – деп атап көрсеткен еді.

Талдықорғанда талай жанның талабы ұшталуда

Садақ ату

Садақ ату

2011 жылы құрылған Алматы облысының орталығы Талдықорған қаласындағы мүмкіндігі шектеулі жандарға арналған облыстық спорт клубы да өз жұмысында осы тың талаптарды бұлжымас басшылыққа алып, пәрменді шаралар ұйымдастыруға талпынуда.<!–more–> Қамкөңіл жандарды спортпен шұғылдануға тартып, олардың қабілетіне қарай спорт түрлерімен айналысуына жағдай жасау арқылы салауатты өмір салтын орнықтыру біздің мекеменің басты міндеті болып табылады. Осылайша мүмкіндігі шектеулі жандардың қандай да бір кәсіппен айналысып, алдарына мақсат, мүдде қоюына септігімізді тигізуге тырысудамыз. Мемлекет басшысы халықтың 30 пайызын бұқаралық спортқа тарту керектігі жайлы да ұдайы айтып келеді. Біздің клуб он екі мүшесі сау адамдармен қатар мүгедек жандарды да спортқа тартып, олардың арасында салауатты өмір салтын насихаттау бағытында құрылды. Мүгедек жандардың спортпен шұғылдануы ел спортының қарыштап дамуына көп септігін тигізеді. Жарымжан адамның ерік-жігерін көрген он екі мүшесі сау адам еріксіз таңдай қағып, спортқа қадам басары анық. Бүгінгі таңда спорт клубында мүмкіндігі шектеулі жандар спорттың он алты түрімен шұғылданады.

Мүмкіндігі шектеулі жандар үш топқа бөлінеді. Әрқайсысы өздерінің шамасы келетін спорт түрін таңдап, жаттығады. Тірек-қимыл қозғалысы зақымданған, көру мүшесі және есту мүмкіндігінен айырылған спортшылар болып бөлінеді. Шұғылданатын спорт түрі де негізгі үш категорияға бөлінеді. Спорттың паралимпиадалық түріне жеңіл атлетика, жүзу, үстел теннисі, нысана көздеу, пауэрлифтинг, шаңғымен жарыс, арбамен билеу, отырып ойнайтын волейбол, волейбол, садақ ату, жағажай волейболы жатса, сурдлимпиадалық түріне футбол, шағын футбол енгізілген. Ал, паралимпиадалық емес спорт түрлеріне тоғызқұмалақ, шахмат, дойбы «64» және дойбы «100» сайыстары жатады.

Облыстық спорт клубы ашылған жылы спортпен шұғылданатын адамдар саны 374 болса, 2014 жылдың қорытындысы бойынша бұл көрсеткіш 500-ден асты. Қазіргі таңда облыс бойынша аудандарды қоса есептегенде клубымызда 24 жаттықтырушы жұмыс істейді. «Ұлттық Паралимпиадалық комитеті» қоғамдық бірлестігінің Алматы облыстық филиалы өткен жылдың 13 қарашасында заңмен тіркеліп, өз жұмысын бастады.

Нәтижелер жеңіспен өлшенеді

Төккен тер, еткен еңбек өз жемісін беріп те жатыр. Нәтиже жаман емес. Жалпы айтқанда, спорт саласы бойынша Алматы облысы жоғары сатыдан көрініп жүр. Сондай-ақ, мүмкіндігі шектеулі жандар арасындағы спортта да ұпайымыз түгел. Нақтырақ айтқанда, 11 халықаралық дәрежедегі спорт шебері, 27 ҚР спорт шебері, 34 спорт шеберлігіне үміткер болса, 48 спортшымыз түрлі разрядтардың талаптарын орындады.

Жеңіл атлетші Байдулдаева Айнұр сан бәсекеде жүлделі болды.

Жеңіл атлетші Байдулдаева Айнұр сан бәсекеде жүлделі болды.

Мәртебелі жарыстарға да қатысып жүрміз. Шымкентте өткен ҚР ІІІ Паралимпиялық ойындарында Алматы облысының командасы 2-орынды жеңіп алса, Таразда өткен додада жалпы есепте топ жарды. Көптеген спортшыларымыз ұлттық құрама сапында өнер көрсетеді. VІІ жазғы Азия ойындарында еліміздің атынан өнер көрсеткен екі футболшымыз Әсет Тұрайысов пен Руслан Таранов жетінші орыннан көрінді. Сондай-ақ, Лондонда өткен Паралимпиялық ойындарға қатысқан жеңіл атлетші Айнұр Байдулдаеваның да өнерін жоғары бағалауға болады. Өткен жылы Юрий Носов әлем чемпионатында төртінші орынды жеңіп алды. Голландияда өткен бүкіләлемдік ойында Ирина Тыщенко жүлделі болды. Малайзияда өткен жарыста да жеңіс тұғырынан көрінді. Қайрат Сарқұлов пен Александр Богданов та ел намысын қолдан бермеді. Пауэрлифтингтен сынға түсетін Гүлбану Әбдіхалықова мен Ләззат Сәлімжанованың шеберлігіне ешкім шүбә келтіре алмайды. Ірі жарыстардан қоржындарын «алтын», «күміске» толтырып қайтатын қос қызға елдің бәрі риза.

Шінетов Есімханның диск лақтыру сәті.

Шінетов Есімханның диск лақтыру сәті.

Сочиде өткен Паралимпиялық ойынға қатысқан. Жеңіс тұғырына көтерілмесе де Ерлан Омаровтың өнері көңіл көншітерлік. Инчхонда өткен Азия Паралимпиялық ойындарында тоғыз спортшымыз ұлттық құрама сапында бақ сынады. Бұл біз үшін үлкен жетістік деп білеміз. Клуб құрылған бірінші күннен бастап спортшыларымыз түрлі жарыстардан жеңіп алған жүлде саны бүгінде 138 алтын, 114 күміс және 72 қола медальға жетті.

 «Кедергісіз келешекке» батыл қадам

Әйгілі балуандар Мәулен Мамыров, Нұрбақыт Теңізбаев спорт клуб жарысына куә болды

Әйгілі балуандар Мәулен Мамыров, Нұрбақыт Теңізбаев спорт клуб жарысына куә болды

Қаламызда атақты спортшылармен кездесулер өткізіп тұру да игі дәстүрге айналған. Мұндағы мақсатымыз спорт саңлақтарының жоғары жетістіктерінің үлгісінде қайсарлық пен жігерлік рухын бойларына сіңіріп, жаңа жеңістерге жетелеу. Сөзіміздің дәлелі ретінде ең соңғы өткізілген осындай іс-шараны мысалға келтіре кетейік. Біздің спорт клубының бастамасымен есту қабілеті нашар және естімейтін балаларға арналған спорт мектебінің оқушылары өңіріміздің түлектері, еліміздің абыройын асқақтатқан даңқты балуандарымыз, Олимпиада ойындарының жүлдегерлері Мәулен Мамыров пен Нұрбақыт Теңізбаев сияқты қос спорт саңлақтарымен кездесті. Бұл мазмұнды да қызықты жүздесуде балалар атақты ағаларына түрлі сұрақтар қойып, олар жайлы көптеген деректерді естіп білді. Сүйсінерлігі сол, республикалық жарыста екінші орын алған мектептің шағын футбол командасының балаларына берілген спорт шебері атағын осы кешке шақырылған мәртебелі меймандар М.Мамыров пен Н.Теңізбаев салтанатты жағдайда тапсырды. Мұның өзі олардың жүрегіне өшпес із қалдырып, спортқа деген қызығушылығын арттыра түсетіні анық.

Осының бәрі мемлекет тарапынан жан-жақты қамқорлық көрсетудің септігімен мүмкін болуда. Дәл қазіргі уақытта мүгедек жандарға деген мемлекеттің қамқорлығы ерекше. Мәселен, инвотаксиді алайық. Алғашында жалғыз көлігімізбен үлгере алмайтынбыз. Ал, қазір, көзді ашып-жұмғанша қалаған жеріңе жеткізіп тастайтын көліктерге алғысымыз шексіз. Облыс әкімдігі мен облыстық спорт басқармасына да үлкен рахмет айтамыз. Спортшылардың оқу-жаттығуына және жарыстарға қатысуына қолұшын беріп, керекті құрал-жабдықтармен қамтамасыз етіп отыр. «Кедергісіз келешекке» жасалған қадам деген осы. Жігері жасымаған қайсар жандардың алдағы уақытта да тамаша табыстарға жететіне біздің сеніміміз зор. Сондықтан өз тарапымыздан қолдан келген жағдайдың бәрін жасап, олардың шеберліктерін шыңдай беруді жалғастыра бермекпіз.

1 пікір

  1. Айна

    08.05.2015 at 11:25

    Сәлеметсіздер! Сіздерге қалай мақала жазуға болады?

Пікір жазу

Әлеуметтік желі арқылы кіруге болады: 

Э-пошта мекенжайыңыз жарияланбайды. Міндетті өрістер * таңбаланған

10 + 19 =