Қазақ паралимпиадашыларының жүзі жарқын
Оңтүстік Кореяның Инчхон қаласында өткен ІІ Азия параойындары өз мәресіне жетті. Осы бәсекеде Қазақ елінің спортшылары 7 алтын, 6 күміс, 11 қола медаль иеленді. Азия параойындарының қорытындысы бойынша отандастарымыз 11-орынға табан тіреді.
Өткенге көз жүгіртсек, 2010 жылы Қытайдың Гуанжоу қаласында өткен алғашқы Азия параойындарында Қазақстан құрамасы 23-орыннан аса алмай, жалғыз алтынға зар болып қайтқан еді. Ал биылғы додада табысымыз қомақты болды. Жалпы, бұл жарыста 23 спорт түрі бойынша медальдар сарапқа салынды. Бес күн бойы тоғыз спорт түрінен ғана бақ сынаған бауырларымыз алтын, күміс, қола медальдарды уыстап алды. Арбамен билеуде Ардақ Отарбаев, Айдана Бегленова, Қарлығаш Тынабековалар ешкімнен осал соққан жоқ. Жеңіл атлетикада Аманат Қалқаев пен Бислан Гебертаев барын салып жүріп, бір күміс, бір қоланы алып шықты.
Отырып ойнайтын волейболшыларымыз жүлделі орынға ілікпесе де, атағынан ат үркетін Иран командасымен тіресті. Қытайлықтармен қаржасты. Иракты тығырыққа тіреді. Жапония мен Моңғолия командаларын ойнап жүріп ұтты. Егер әділіне келсек, біздің волейболшыларымызды жүлде алмады деп кінәлаудың жөні жоқ. Бір ғана мысал, қазақстандықтарды ұтып, меселін қайтарған ирандықтар бұған дейін қатарынан сегіз дүркін әлем чемпионы, Паралимпиада жеңімпазы атанған. Одан қалды, Иран елінде отырып ойнайтын волейболдан табаны күректей 130 команда бар. Азияға сол 130 команда арасынан топ жарып шыққандар келді. Қазақстанда бар-жоғы 8 команда. Ал енді арғы жағын өзіңіз-ақ пайымдай беріңіз…
Соңғы жылдары Азия бәсекесінде Қазақстан құрамасының дәл осылай олжалы оралған кезі есімізде жоқ. Әсіресе, жүзу сайысында жүзіміз жарқын жүрді. Жалғыз Әнуардың өзі бес алтын, үш күміс, екі қола медальді жұлып түсті. Зүлфия Ғабидуллина, Дмитрий Ли де осы сайыста бір-бір бас жүлдеге ілікті. Сонымен қатар эстафеталық жарыста Әнуар Ахметов, Бекжан Есіркепов, Әлібек Уақбаев және Андрей Афанасьев екі рет чемпион атанды.
Ал дзюдо, теннис, мылтық ату, садақ ату және пауэрлифтинг сайыскерлеріне жүлде бұйырмады. Тек жеңіл атлетика бәсекесінде Аманат Қалқаев 200 метрлік жарыста қола жүлдеге қол жеткізді.
Сөйтіп, 7 алтын, 6 күміс, 11 қола медальдi қанжығаға байлаған Қазақ елі жарыс қорытындысы бойынша 11-орынға табан тіреді. Осы ойында жүлдені күреп алған Қытай спортшылары болды. Олар 317 медаль олжалап, ІІ Азия параойындарының жеңімпазы атанды. Екінші орынды корейліктер еншілесе, үшінші орынды жапондықтар иеленді.
