Бүгін, 20-шы қарашада Астана қаласындағы пара велоспорттан тректегі ел біріншілігі басталды.
Жарыс тірек-қимыл аппараты, көру қабілеті зақымданған және зияткерлік даму ерекшеліктері бар спортшылар арасында І, В, С класстары арасында өтуде. Спортшылар 200 м спринт, 4000 м із қуу дисциплинасы мен 1000 м жекелей сында және 750 м командалық спринтте өнер көрсетеді. Шараның ашулы салтанатына пара велоспорт федерациясының вице-президенті Кенжеғұл Сейітжан, Қазақстан Республикасы Парламенті Мәжілісінің депутаты Нүргүл Тау және Дене мүмкіндіктері шектеулі тұлғаларға арналған спорттық даярлау орталығының директоры Болатбек Дукетаев қатысып, спортшыларға сәттілік тіледі.
"Бүгін чемпионатқа еліміздің 6 өңірінен 50-ге жуық спортшылар келді. Қазіргі уақытта пара велоспорт Қазақстанда қарқынды дамып келе жатқандығы қуантады. Осы дамудың жемісі — жуырда Жапонияда өткен V Азия Пара ойындары. Аталмыш бәсекеде спортшыларымыз 4 алтын, 5 күміс және 1 қола медаль олжалап, жалпы есепте Азияның үздіктері қатарынан көрінді. Мен әрқайсыңыздың осы жетістікке жете алатындарыңызға сенемін. Бүгінгі жарыста төрешілерге — әділ төрелік, жанкүйерлерге — әдемі жарыс тілеймін!",-деді Болатбек Дукетаев.
Айта кетейік, пара велоспорттан Қазақстан Республикасының чемпионаты 23-ші қарашаға дейін жалғасады. Жарысқа Абай, Қостанай, Қарағанды, Қызылорда облысы мен Астана және Алматы қалаларының спортшылары қатысуда.