Португалияның Вила Реал де Санто Антонио қаласында IWAS -2022 дүниежүзілік ойындары мәресіне жетті. Жарыста 34 мемлекеттен 500-ге жуық спортшы қатысты.
Ел намысын 27 спортшы спорттың үш түрінен қорғады: пара жеңіл атлетика, пара жүзу және пара пауэрлифтинг. Дүбірлі додада қазақстандық пара спортшылар лайықты өнер көрсетіп, 14 «алтын», 20 «күміс» және 20 «қола» медальді еншіледі.
Айта кетсек, IWAS ойындары – бұл арбаға таңылған және дене мүмкіндігі шектеулі спортшыларға арналған спорт ойындары болып келеді. Ол әр екі жыл сайын өткізіледі. Қазіргі таңда IWAS ұйымына 73 мемлекет мүшелік етеді.